Parliament in hnihah Rorel thei loin inkhawm titawp leh
Parliament budget session thawh hnihna neih mekah, nimin khan Rajya Sabha leh Lok Sabha-ah Congress party hruaitu Rahul Gandhi thusawi chungchanga rorellai leh eptu member-te an inaubuai leh avangin rorel thei loin inkhawm tihtawp a ni leh.
Rahul Gandhi-a'n London-a thu a sawi ṭuma 'India ram democracy innghahna chuan beih a tawk mek a ni,' ti zawnga thu a sawi chu BJP lamin an helh hle a, Gandhi chu ramdanga India sawichhiaah puhin ngaihdam dil turin an phut. Mahse Congress party chuan prime minister Narendra Modi ngei pawhin ram danga a zinchhuahnaah India ramchhung politics-te sawichhuakin, chanchin ṭha lo lam a sawi fo tih sawiin, Rahul Gandhi hian ngaihdam a dilna chhan tur a awm lo tiin a thlavang an hauh tlat thung.
Nimina Parliament in hniha rorel ṭan a nih veleh, Gandhi thusawi chungchangah BJP member-te chuan Gandhi chu ngaihdam dil tura an phut thu an aupui leh nghal a, hetih lai hian eptu lam chuan Adani Group thiltih dik loh nia sawi chu Joint Parliamentary Committee chhuitir an phut thu an aupui ve bawk. Eptute hian Adani Group an puhna chhui chian phut hian nawrh pawh an lo huaihawt fo tawh bawk.
Lok Sabha-ah chuan minute 20 vel zet member-te an aubuai hnuah, speaker Om Birla chuan inkhawm hi a titawp a ni. Nimina inkhawmah hian Rahul Gandhi, Sonia Gandhi, defence minister Rajnath Singh leh union minister eng emaw zat an tel a ni. Rajya Sabha-ah pawh hun rei vak lo an ṭhutkhawm hnuah ro rel thei loa member-te an aubuai avangin inkhawm tihtawp a ni zui ve bawk a ni. House pahnihah hian karleh Thawhṭanni thleng atan inkhawm hi tihtawp a ni. Thawhṭanni chawhma dar 12-ah inkhawm hi chhunzawm leh a ni ang.
March 13 khan Parliament budget session thawh hnihna hi chhunzawm a ni a, mahse nimin thleng khan rorel mumal thei loin an la awm a, inkhawm tihtawp a ngai fo a ni. Session hian April 6 thleng a awh dawn a ni.
Rahul Gandhi chuan a thusawi chungchanga BJP puhnate chu Parliament House-ah thusawi phalsak a nih chuan a chhang ang tiin a sawi a, hetih lai hian BJP lam chuan ngaihdam a dil phawt loh chuan thusawi phalsak a ni lo ang, an ti ve thung.