Venugopal-a'n PM Modi lakah privilege motion pulut

Congress hruaitu, KC Venugopal chuan prime minister Narendra Modi chu Sonia Gandhi leh Rahul Gandhi chungchang a sawinaah ṭawngkam mawi lo leh sawichhiatna a hman avangin, nimin khan Rajya Sabha-ah PM lakah privelege motion a pulut.

Venugopal hian Rajya Sabha chairman Jagdeep Dhankhar hnena lehkha a thehluhah, February 9-a Prime Minister-in Presi­dent a Address chung­changa Motion of Thanks-a a thusawi a tarlang a ni.

Congress party-in a thusawiah Nehru hming a lam ri lo tia an sawi a chhannaah, PM Modi hian Gandhi chhungkhua chu beiin Nehru thlahte tumahin Nehru surname an hmang lo tih sawiin, Nehru tih chu hmang zakah puhin Congress hruaitu Rahul Gandhi, Priyanka Gandhi Vadra leh Sonia Gandhi-te a bei zui a ni.

Venugopal chuan PM Modi hian tihdan phungah fanuten pasal an neihah an pate surname an hmang zui zel lo tih chiang takin a hria a, hre reng chungin ngeiawm takin he thil hi a sawi lui a ni, a ti. He thu a sawi laia PM awmdan leh awki te chu a ngeiawm hle tih a sawi bawk.