Sorkar laipuiin YouTube link 4,999 a block tawh

Rajya Sabha-a ziaka zawhna a chhannaah, ministry of electronics and information technology chuan sorkar laipuiin YouTube link 4,999 a block tawh tih a sawi. Heng a block zingah hian video mal leh channel pumte a tel.

IT ministry chuan kumin bikah March 10 thleng khan Information Technology Act, 2000-a Section 69A hnuaiah “social media URLs, accounts, channels, pages, apps, web pages, websites, etc” 974 block a ni tawh tih nimin khan a tarlang a ni. Kum 2014 aṭanga 2022 thleng khan 471, 500, 633, 1385, 2799, 3635, 9849, 6118, leh 6935 a block tawh a ni.

Section 69A hnuaiah hian sorkar chuan India ram leh state himna tiderthawng thei, ram dang nena inlaichinna tichhe thei thilte tih­chhuah khapna a siam thei a ni. Heng khapna tihchhuah hi Review Committee-in ennawnin a sut thei a, mahse kum 2014 aṭang khan sorkar khapna tihchhuah tawh hi Committee-in sut a la nei lo.