Punjab sorkarin SMS leh internet service titawp chhunzawm

Punjab sorkar chuan Khalistani hruaitu Amritpal Singh man tuma zawn mek karah, kar liam ta Inrinni aṭanga state puma mobile internet leh SMS service a tihtawp chu vawiin tlai thleng atan a pawhsei leh.

Mobile internet leh SMS service tihtawp hian state mipui maktaduai 27 vel a nghawng a, ni thum chhung service hi titawp ni tawhin hei hi India rama internet service tihtawpin nghawng a neih tam ber zingah a tel.

Sorkar laipui chuan Amritpal Singh man tuma beihpui thlak mek, Punjab police-te pui turin central force pawh a tir a ni. Singh hi an la man thei lo a, a pawl Waris Punjab De member erawh eng emaw zat an man tawh a ni.

Punjab state-a ram hran, independent nation Khalistan din phutna, Khalistan movement hi dan pawna hnawl niin sorkar laipui chuan ram himna tiderthawng thei niin a sawi a, hetih lai hian ram chhung leh ram pawna Sikh zingah thlawptu tam tak an awm thung.

Khalistan hruaitu Singh man tuma zawn mek a nih avang hian amah thlawptute chuan London-a Indian High Commission chu an bei a, India hnam puanzar tar an la thla a ni.An chetdan hi UK thuneitute pawhin an dem thu an sawi a, London mayor Sadiq Khan chuan London khawpuiah hetianga pawikhawihna thlen zawnga chetna chu an duh lo tih sawiin, Indian High Commission beih chungchang chu chhuizui a ni dawn tih a sawi bawk.

India hi democracy ram zingah kum nga chhung chu a zawnin internet shutdown ngunna ber ram a lo ni tawh a ni. Tun thla tir lama New York-based advocacy group, Access Now in report a tihchhuahah, kum 2022 chhung khan India ramah internet shutdown ṭum 84 a thleng a ni. Hetianga service tihtawp fo hian mipuite nitin khawsak phungte a nghawng buai a, harsatnate a thlen ṭhin a ni, tiin report chuan a tarlang.