Parliament in hnihah rorel inkhawm titawp leh

Parliament budget session thawh hnihna neih mekah, nimin khan Rajya Sabha leh Lok Sabha-ah Rahul Gandhi thusawi chungchang leh, Adani Group chhui chian phuta rorellai leh eptu MP-te an aubuai leh avangin inkhawm tihtawp a ni leh. Ni ruk chhung chu rorel mumal thei loin Parliament in hnih inkhawm hi tihtawp a ni tawh.

Eptu member-te chuan Hindenburg report bawhzui a, Adani Group dinhmun chu Joint Parliament Committee (JCP) chhui chian tir an phut thu an aupui leh. Hetih lai hian BJP lam chuan UK-a India democracy dinhmun a sawi dan avangin Rahul Gandhi chu ngaihdam dil tura an phut thu sawiin, rorel lai thei loin an aubuai ve bawk.

Congress party chuan Lok Sabha-a Rahul Gandhi chungchanga rorellai lam leh eptu member-te an inaubuainaah an party lam microphone chu ri chhuak thei loin minute 20 vel dahsak an ni tih an sawi. Mahse sorkar lam chuan khawl lam fel loh vang niin a sawi ve thung.

Rorel thei loa member-te aubuai vanga inkhawm tihtawp a nih hnuah pawh, BJP leh Congress membert-te chu Parliament pawn lamah Gandhi thusawi leh Adani chungchangah na takin an la inbei zui leh bawk.

Parliament budget session hi chawlh lailawk a nih hnuah March 13 aṭang khan a thawh hnihna hi neih ṭan a ni. Mahse session thawh hnihnaah hian House pahnihah rorel mumal thei loin inkhawm tihtawp a la ngai ziah a ni.