High Court-in Punjab police-te a khak; "Police 80,000 ten eng nge an tih?"

Punjab leh Haryana High Court chuan Khalistani leader Amritpal Singh an man theih loh chungchangah Punjab police-te khakin, an hmalak dan report kimchang thehlut turina nimin khan hriattir.

High Court chuan police-te lak aṭanga Amritpal Singh a bibo thei chu state police intelligence hlawhchhamna a ni tiin, Punjab sorkar hnenah, "Police 80,000 in ni a, eng nge an tih? Engvangin nge Amritpal hi a tlanchhuah theih?" tiin a zawt.

Punjab police-te chuan kar liam ta Inrinni khan Amritpal Singh man tuma beihpui an thlak thu leh, amah man thei lo mah se Singh leh a pawl, Waris Punjab De thlawptu mi 120 an man thu an sawi. Police-ten man tuma an zawn laiin, Jalandhar district-ah police lak aṭangin Amritpal Singh hi a tlanchhe hman a ni. Police-te chuan Singh lakah hian National Security Act hnuaiah thubuai ziahluh a nih thu pawh an sawi bawk.

Amritpal Singh man tuma zawn mek karah, sorkar laipui chuan ramri kaltlanga ram pawn lama tlanchhuah a tum palh thulhah, international border vengtute chu inralring turin a chah.

Ministry of home affairs (MHA) chuan Border Security Force (BSF) leh Sashastra Seema Bal (SSB) hotute hnenah, border-a duty an sipaite chu inralring tura hriattir turin a chah. Nepal, Punjab leh Bangladesh nena inrina, international border-a border outpost-te pawh Amritpal Singh tlanchhuah a tum palh thei tih hriattirin, thlithlai reng tura hrattir an ni. Heng hmun hrang hrangah Amritpal Singh thlalak pawh thawn kual vek a ni bawk.