Delhi budget pharh tur dang lo turin PM Modi ngen

Delhi chief minister Arvind Kejriwal chuan, nimin khan prime minister Narendra Modi hnenah lehkha thawnin, Delhi budget pharh tur chu tibuai leh dang lo turin a ngen.

Delhi-a Aam Aadmi Party (AAP) sorkarin budget 2023-24 pharh a tum hun a ni a, mahse BJP kaihhruai sorkar laipui leh AAP sorkar hi kawng hrang hrangah thil dik lo tia inpuha an inkar boruak ṭha lo avangin budget pharh tur pawh hi an ṭhulh rih a ni.

Chief Minister Kejriwal chuan PM Modi hnena lehkha a thawnah, "Tun ṭum hi kum 75 chhunga state budget pharh tur dan a nih ṭum khatna a ni. Delhi mipuite chungah eng nge i lungawi lohna? Khawngaihin Delhi budget hi lo dang lo a, Delhi mipuiten an budget pass phalsak turin an ngen che a ni," tiin a ziak. Kejriwal chuan sorkar budget pharh tur dan sak hi ram chhungah a thlen ṭum khatna a ni tih a sawi bawk.

Delhi sorkarin budget a pharh tur hi ministry of home affairs (MHA) chuan a dansak niin sorkar lam chuan an sawi.

Hetih lai hian MHA chuan budget proposal-ah advertisement tan sum tam tham tak dahin, infrastructure leh hmasawnna hna thawhna tur dangahte funding a dah tlem avangin Delhi sorkar chu sawifiah phawt turin a ti niin a sawi ve thung.

AAP national spokesperson leh minister Saurabh Bharadwaj chuan budget dansak chu India ram pum tan pawha thil zahthlak tak a nih thu sawiin, MHA thiltih dan chu chhui chian a ngai a ni, a ti. He thil phenah hian sorkar laipui chu inrawlhin, anmahni ṭhatna tur ngaihtuah vangin budget hi dangin an tihkhawtlai sak tih a sawi bawk.