Mamata Banerjee-in sorkar laipui lakah lungawi lohna lantir dawn

West Bengal chief minister leh Trinamool Congress (TMC) hruaitu, Mamata Banerjee chuan BJP kaihhruai sorkar laipui chu West Bengal state en hrang bikah puhin, March 29 leh 30 hian Kolkata-ah sorkar laipui laka lungawi lohna lantir a tum.

CM Banerjee chuan BJP sorkar hian West Bangal-a MGNREGA project bakah, housing leh road department hnuaia hnathawhna tur fund a pe chhuak duh lo niin a sawi.

"West Bengal hi sorkar laipui aṭanga engmah dawng lo state awm chhun a ni. Kan sum dawn ve tur ngei pawn min la pe lo a, kumina union budget-ah pawh kan state tan engmah dah a ni ve lo," tiin CM chuan a sawi a ni.

Sorkar laipuiin state thliar leh enhran bik a neih duh lohna lantirin, Kolkata-a Dr BR Ambedkar lim bulah ni hnih chhung sit-in demonstration a neih tur thu hi a puang a ni.

Banerjee hi ni thum cham turin nimin khan Odisha state-ah a zin a, mimal thila zin ni mah se a cham chhung hian Odisha chief minister Naveen Patnaik nen meeting an nei ang. Tun thla tawp lam hian Delhi-ah zin a tum bawk.