ECI-in NCP national party status ennawn dawn

Election Commission of India (ECI) chuan Sharad Pawar-a kaihhruai, Nationalist Congress Party (NCP) hnena 'national party' nihna a pek chu a ennawn dawn.

NCP hian national party ni thei tura ngaite a tlin tawh lo nia sawi a ni.

Political party hi 'national party'-a pawm tur chuan state pali leh a aia tamah Lok Sabha emaw, assembly inthlanah emaw vote tla aṭanga 6% tal a hmuh phak a ngai a, hei bakah hian Lok Sabha seat pali tal a neih phak a ngai bawk. ECI hian nimin khan NCP aiawhte koin thu a zawtchiang a ni.

Kum 1999, May 20-a Indian National Congress (INC) aṭanga hnawhchhuah an nih hnuah, Sharad Pawar, P.A Sangma leh Tariq Anwar-te chuan kum 1999, June 10 khan Nationalist Congress Party (NCP) hi an din.

Congress aṭanga chhuaka party thar din an ni chungin, kum 1999-a Maharashtra-a Congress kaihhruai sorkar leh, kum 2004-a central-a Congress kaihhruai United Progressive Alliance (UPA) sorkarah khan NCP hi an tel zui leh tho a ni.

NCP dintu zinga mi, PA Sangma chuan President thlannaah a chuh dawn vangin NCP hi a chhuahsan a, kum 2013-ah party thar National People's Party (NPP) a din ve leh a ni.