Anti-Modi poster vangin Delhi police-te'n mi 6 an man

Delhi khawpui chhunga prime minister Narendra Modi duh lohna leh sawiselna poster tar vangin Delhi police-te chuan thubuai 36 ziaklutin, mi paruk an man. Man zinga pahnihte chu printing press neitu an ni.

Police-te chuan khawpui chhunga poster tar lakthlak hna hi kalpuiin, Thawhlehni khan hmun hrang hrang aṭangin poster 2,000 vel dawn an la thla. Heng poster tar tam zawkah hian "Modi hatao, desh bachao (Remove Modi, save the country)" tih a inziak. Police-te chuan Aam Aadmi Party (AAP) office-a thawn tur poster eng emaw zat chu motor van-ah an man tih an sawi.

Vantlang hmun tihhnawk leh, poster tarahte printing press hming tarlang zel tura danin an phut angin, heng poster tarte hi lakthlak leh, a inhnamhnawihte man an nih thu police-te chuan an sawi. Thawhlehni khan FIR 138 ziaklutin, heng zinga 36 chu anti-Modi poster chungchang vang a ni.

AAP chuan Delhi police-te FIR thehluh chungchang chu twitter-ah zawt ve nghalin, poster an lakthlakah chuan eng thil nge an huat ber tih an zawt. AAP chuan Modi kaihhruai sorkar-ah mimal rorelna, dictatorship chuan a vanglai a tawng chho mek a ni, an ti.

Delhi-a rorellai AAP leh central-a rorellai, BJP inkar boruak hi a chhe chho hle a, tun ṭumah pawh BJP chuan AAP chu na taka rawn bei nghalin, poster tar tur chungchangah dan an zawm lo a ni, an ti. "AAP chuan lungawi lohna lantirtu an ni tih an sawi lang ngam lo a, poster siam dan turah dan pawh an zawm lo," tiin BJP thupuangtu Harish Khurana chuan a sawi.

Hetih lai hian AAP chuan Jantar Mantar-ah prime minister Narendra Modi duh lohna lantirna leh, bang tura phutin nawrh an huaihawt dawn tih an sawi.