Punjab Police-te'n Amritpal Singh lakah LOC leh NBW tichhuak

Punjab police-te chuan man tuma an zawn mek, Khalistani leader Amritpal Singh lakah lookout circular (LOC) leh non-bailable warrant (NBW) an tichhuak.

Nimina Chandigarh-a press conference a neihah, Punjab inspector general of police (headquarters) Sukchain Singh Gill chuan Singh hi man a la ni lo tih sawiin, "Man ngei tumin theihtawp kan chhuah mek a, kan man theih thuai pawh kan beisei. Police-te hmalaknaah state dangte leh central gency-te pawhin min thawhpui ṭha hle a ni," a ti. Mipuite pawh an theih anga police-te lo pui zel turin a ngen nghal bawk.

IGP Gill chuan Thawhlehni khan Amritpal Singh thlalak, thawmhnaw hrang hrang nena a thlalak eng emaw zat an tihchhuak a ni. Heng thlalakte hi mipuite hmuh theih tura tarchhuak tura ngenin, mipuite thawhpuina a ngen bawk a ni.

Waris Punjab De hruaitu Amritpal Singh hi kar liam ta Inrinni, March 18-a police-te'n man tuma an zawn laiin Jalandhar-a gurdwara-ah darkar khat vel a awm a, a thawmhnawte thlakin a ṭhuihruai palite nen eitur an eichhuak tih hriat a ni. An kalchhuah dawnin Singh hian puithiam phone pawh hi a hmansak bawk. Hemi hnu hian motorcycle hmangin a tlanchhuak leh a ni.

IGP chuan gurdwara an chhuahsan hnuah Amritpal Singh leh a ṭhuihruaite hi an kalna lam chin hriat zui a ni lo tih a sawi a, state dang a pan em tih pawh ngawrh takin an chhui mek tih a sawi.