Surat Court-in kum 2 jail tang turin Rahul Gandhi a hrem

Gujarat-a Surat court chuan Congress party hruaitu, Rahul Gandhi chu kum 2019-a 'Modi surname' chungchanga a thusawi avanga defamation case thehluhah nimin khan thiam loh chantirin, kum hnih jail tang turin a hrem.

Rahul Gandhi hian kum 2019-a Lok Sabha inthlanpui neih hmaa Kolar, Karnataka-a rally neihnaa thu a sawinaah, 'Engtin nge rukru zawng zawng hian an common surname-ah Modi tih hi an neih vek theih zawk?", tiin a sawi a ni. A thusawi avang hian Gujarat minister hlui leh BJP MLA Purnesh Modi chuan complaint a thehlut a ni.

Nimina Surat court-in thiam loh chantir a, a hremna tur a tihchhuah hnuah Gandhi hi bail a dilna a phalsak zui leh nghal bawk. Gandhi hian hremna an pek hi ni 30 chhungin a appeal thei dawn bawk a ni.

Court thutluka hi eptu pawl hruaitute chuan na takin an sawisel nghal a, Rahul Gandhi-a farnu, Priyanka Gandhi Vadra chuan, "Rorelna hmun pawimawhte chuan Rahul Gandhi aw chhuah tur danbeh an tum mek a ni. Ka nuṭapa hian a hlau ngai lo ang. Thudik tak a sawichhuak a, a la chhunzawm zel ang. Ram mipuite tan a aw a chhuah zel dawn a ni," tiin a sawi.

Delhi chief minister Arvind Kejriwal pawhin eptu hruaitute nuaibona tura phiarruk kalpuina tiin a puh bawk. "Eptu party leh an hruaitute danchahna tura phiarrukna a ni. BJP party ni lo hruaitute lakah thubuai thehluhna tur phiarrukna kalpui a ni. Rahul Gandhi nen hian ngaihdan inmil lo tak kan nei fo a, mahse defamation case chungchanga awhbeh an tumna a dik lo. Court hi ka zah hle a, mahse a thutlukna erawh hi chu ka pawmpui lo," a ti.

Congress president Mallikarjun Kharge chuan an party chuan court thutlukna chu dan hmang vekin an bei let dawn tih a sawi. "Bail a dilna pawmsak a ni. A tir aṭangin he case ngaihtuahtu judge hi an thlak kual reng avangin thil thlen dan tur hi kan hre sa a ni," a ti a, Rahul Gandhi lawyer pawhin he case chungchang court-in a ngaihtuah danah a tir aṭangin a dik tawk lo hle tih a sawi bawk.

Rahul Gandhi in court-in hremna a tihchhuah hnu hian a twitter-ah a innghahna chu thudik leh tharum tello a ni tih sawiin Mahatma Gandhi thusawi, 'Truth is my God' tih chu a rawn tarlang a ni.