BJP-in anti-Kejriwal poster an tar ve leh

Delhi khawpuia prime minister Narendra Modi duh lohna leh sawiselna, anti-Modi poster tarte chu police-ten la thla a, mi paruk an man hnuah BJP chuan nimin khan Delhi chief minister Arvind Kejriwal duh lohna poster an tar ve leh.

Delhi police-te chuan Thawhlehni khan khawpui chhunga anti-Modi poster, "Modi hatao, desh bachao (remove Modi, save the country)" poster 1,000 chuang zet an la thla a, mi paruk manin an zinga pahnih chu printing press neitu an ni. Thubuai pawh eng emaw zat an ziaklut bawk.

Nimin khan khawpui chhunga Kejriwal sawiselna, mi rinawm lo leh eiru tia, "remove Arvind Kejriwal, save Delhi" tih inziak chu tarchhuah a ni a, hengte hi BJP hruaitu Manjinder Singh Sarsa tartir a ni tih an sawi.

CM Kejriwal chuan poster-te hi a hmuh ve thu sawiin, democracy ramah chuan tupawhin an duhzawngte sawia poster tar turin dikna an nei a ni, a ti. "Heng poster avang hian harsatna ka neih phah lo. A hmaa poster tar vanga press neitute leh midangte an man ngawtna chhan kha ka hrethiam lo a. Prime Minister hian a hlauhthawng hle tih a tilang zawk mai mai a ni. Prime Minister chak takin hetiang thil a buaipui viau hi a ṭha lo khawp mai," a ti.