Eptu party 14-ten Supreme Court-ah petition thehlut

Eptu party 14-te chuan BJP kaihhruai sorkar laipui chu central investigating agency-te dik lo taka hmang ṭangkaiah puhin Supreme Court-ah petition an thehlut. Court chuan April 5-ah hearing an nei ang.

Party-te chuan Central Bureau of Investigation (CBI) leh Enforcement Directorate (ED)-te chuan BJP eptu party dang hruaitute chauh an bitum tawh a ni, an ti. Party hruaitu a hmaa thubuai leh chhui mekte chu BJP an zawm hnuah an thubuaite hi tihtawp emaw, chhui zui loh emawin dah a ni nghal zel tih an sawi bawk.

BJP chuan eptute puhna hi an pha thung a, agency-te thiltihah inrawlhna an neih loh thu an sawi.

Supreme Court-a petition an thehluhah, epty pawlte chuan central agency-te chuan an mi chhuite man theih dan tur chungchang, pre leh post-arrest guideline siam an phut bawk. Etpu pawl aiawha petition thehluttu, senior advocate Abhishek Manu Singhvi chuan, "Central agency-te case siamsak zingah 95% hi eptu pawl hruaitute an ni," a ti.

Court-ah petition thehluttu zingah hian Congress, Trinamool Congress, Aam Aadmi Party, Janata Dal-United, Bharat Rashtra Samithi, Rashtriya Janata Dal, Samajwadi Party, Shiv Sena (Uddhav Thackeray faction), National Conference, Nationalist Congress Party, Left leh DM-te an tel.

Chief justice of India DY Chandrachud chuan eptu pawlte petition thehluh hi urgent listing-ah dah remtiin, April 5-a ngaihtuah turin a ti a ni.

Eptu MP-ten Rashtrapati Bhavan panin kawng an zawh

Congress party kaihhruaiin nimin khan eptu party MP-te chuan Vijay Chowk aṭangin Rashtrapati Bhavan panin kawng an zawh a, 'democracy dinhmun hlauhawm takah a awm mek' tih thu ziakna banner an keng a ni.

Kawngzawh hi eptu member tam takin an zawm a, Delhi police-te chuan lo dangin MP-te an hren hnuah pungkhawm dangte chu an hnawtdarh zui a ni. MP-te hi bus-in police station-ah hruai an ni. Police-te hian kawngzawh huaihawtna tur hian phalna an nei lo tih an sawi.

Eptute hian Adani-Hindenburg issue chu joint parliamentary committee (JCP) chhui tir phutin hun eng emaw chen sorkar an nawr tawh a, nawrh pawh an lo huaihawt tawh bawk. Hindenburg report avanga Adani share tlahniam hian, ram chhungah LIC leh SBI-te nasa taka nghawngin, mipui sum tam tak hloh a nih phah tih an sawi.