'Modi Surname' case-a thiam loh chantir Rahul Gandhi-a MP nihna hlihsak a ni

Congress party president hlui, Rahul Gandhi chu Gujarat-a Surat court-in kum 2019 defamation case, 'Modi Surname' case-ah thiam loh a chantir a, kum hnih jail tang tura a hrem tak avangin Lok Sabha MP a nihna chu hlihsak a ni.

Lok Sabha Secretariat chuan nimin khan thuchhuah siamin, Gandhi chu MP a nihna aṭangin disqualify a ni a, a bial Wayanad, Kerala ami pawh bial ruak a ni tih a puang zui bawk. Election Commisison chuan Rahul Gandhi bial hluiah special election neih hun tur a la puang dawn a ni.

Nimina thuchhuah a siamah, Lok Sabha Secretariat chuan, Wayanad bialtu MP, Rahul Gandhi chu a thubuaiah March 23, 2023 khan court-in thiam loh a chantir avangin, Constitution-a Article 102 (1) (e) leh Represention of the People Act, 1951 Section 8 hmangin Lok Sabha MP a nihna aṭangin disqualify a ni, tiin a tarlang.

Representation of the People Act, 1951-a Section 8(3) chuan Parliament member-te chuan thubuai an neiha thiam loh chantir an nih a; kum hnih chin tal tang tura hrem an nih chuan MP an nihna aṭangin disqualify an ni thei tih a tarlang a ni.

Congress hruaitu Manish Tewari chuan Lok Sabha Secretariat thiltih dan chu a dik loh thu sawiin, MP an disqualifty ve ngawt thei lo. President-in Election Commission a biakrawn hnuah a disqualify thei chauh a ni, a ti. Congress senior MP Shashi Tharoor pawhin court thutlukna tihchhuah a nih aṭanga darkar 24 chhung, hei bakah appeal-na tur pawh buaipui a nih lai mekah rang taka thutlukna siam a ni mai chu mak a tih thu sawiin, India ram democracy hmalam hun duhawm lohzia lantirtu a ni, tiin a sawi.