Congress-in ram pumah ‘Sankalp Satyagraha’ huaihawt
Congress party chuan an party hruaitu, Rahul Gandhi-a Lok Sabha member a nihna aṭanga disqualify a nih avanga lungawi lohna leh, Gandhi an thlawpna lantirin nimin khan ram chhung hmun hrang hrangah ‘Sankalp Satyagraha’ an huaihawt.
Delhi-ah chuan he hun hi Rajghat-ah buatsaih a ni. Satyagraha buatsaihah hian Congress president Mallikarjun Kharge, general secretary Priyanka Gandhi Vadra, senior leader - KC Venugopal, P.Chidambaram leh Salman Khursid-te bakah hruaitu dang ṭhahnem tak an tel.
Delhi Police-ten Satyagraha buatsaih turin phalna pe duh lo mah se, Rajghat chhehvelah party worker tam tak an pungkhawm a ni. Police-te chuan dan leh thupek dinhmun leh, traffic lamah harsatna a thlen dawn vangin phalna hi an pe thei lo tih sawiin, Rajghat leh a chhehvelah punkhawm khapna, CrPC Section 144 an puang zui bawk.
Party hruaitu Vengugopal chuan a twitter-ah Delhi Police-te thiltih dan hi chhangin, "Parliament-ah kan ṭawngrite min tihrehsak hnuah, sorkar laipui chuan Bapu (Mahatma Gandhi) samadhi-ah boruak ṭha tha tak hnuaia satyagraha neih pawh min phalsak lo leh ta a ni," a ti. Eptu lamin nawrh an tum aṭanga phalsak duh loh chu Modi-a kaihhruai sorkar laipui chuan tihdan phungah a nei ta tiin, mahse hei hian thudik hailanna tura an beihna chu a dang dawn lo a, an bei zui zel dawn tih a sawi.
Kum 52 mi, Rahul Gandhi hi Gujarat-a Surat court-in kum 2019-a a thusawi avanga intihhmingchhiat thubuai siamsakah thiam loh chantirin kum hnih tang turin a hrem a ni. Court-in hremna a puan tuk, kar liam ta Zirtawpni khan Gandhi hi Lok Sabha member a nihna hlih a ni zui nghal bawk. Rahul Gandhi hian Surat court thutlukna siam hi court sang zawkah a appeal dawn a. A appeal-naah court sang zawkin thiam loh chantir a nihna hi a dang, 'stay' a nih loh chuan term li MP lo ni tawh, Rahul Gandhi hi kum riat chhung inthlan a chuh thei lo ang.
Parliament member a nihna hlihsak a nih hnuah, Rahul Gandhi hian a twitter bio pawh ziak ṭha nghalin, 'Dis'Qualified MP' tiin a ziak. Gandhi hian Surat court thutlukna hi appeal a tum thu sawi mah se, nimin thleng khan appeal-na a la thehlut lo. Mahse appeal tur hian court thutlukna tihchhuah aṭanga chhiarin ni 30 chhung hun a nei dawn a ni.
US legislator-ten Rahul-a diqualify-na sut turin Modi an ngen
US-a Congressional Caucus on India and Indian American co-chair, Indian American Congressman Ro Khanna chuan prime minister Narendra Modi hnenah Indian democracy ṭhatna tur ngaihtuah a, Parliament member aṭanga Rahul Gandhi disualify-na chu sut turin a ngen.
Khanna chuan, "Rahul Gandhi hnawhchhuah a nih dan hi Gandhian philosophy leh India ram hlutna tlakhniam phahna lian tak a ni. Hei ka pu in kum tam tak jail-a tan phah a, India ram tana a beihna chhan kha a ni lo," tiin PM Modi chu Indian democracy tan, he thutlukna siam tawh hi sut turin thuneihna a nei tih a sawi.
US legislator dang, Senator Van Hollen pawhin Rahul Gandhi chunga thutlukna siam chuan a ṭhawng hle tih a sawi. "Democracy ramah chuan eptute chu an aw chhuah thei loa hrekbeh an ni lo a, kan inhnialpui zawk a ni. Democracy ramah chuan zalen taka thu sawi theihna a awm ngei tur a ni a, hetih lai hian India chu WorldPress Freedom Index-ah pawh no 150 aṭangin 180-ah a tla thla tawh a ni. Hei hi kawng dik lo pana ke penna dik tak a ni," tiin a sawi ve bawk.