Canada-a Khalistani thlawptuten nawrh huaihawt chungchang sorkarin zawtfiah

Ministry of external affairs chuan Toronto, Canada-a Consulate General of India pawn lama Khalistani thlawptuten nawrh an huaihawt chungchangah, India-a Canadian high commissioner chu koin a zawtfiah.

Sorkar laipui chuan police-te awm reng chunga Khalistani thlawptuten nawrh huaihawt phalsak an nih dan leh, he thil thlenga an lungawi loh thute an sawi a ni. Canada chu Vienna Convention hnuaia an thutiamte vawng tura hriattir nawn lehin, nawrh huaihawt leh tharum thawhna thlenga tel hriatchian tawhte chu man a, thubuai siamsak turin a ngen.

Canada sorkar chuan an rama India palai awmte leh, an hmunhmate pawh an him ngei theihna tura hma a laak an beisei tih ministry chuan a sawi bawk.

Khalistani thlawptuten nawrh an huaihawt vang hian Canada-a India palaiin British Columbia province-a hun a hman tur pawh security lam venthawn thilah ṭhulh a nih phah a ni.