Rahul Gandhi hnenah a bungalow chhuahsan turin hriattir

Lok Sabha member a nihna hlihsak a nih hnuah, Congress party hruaitu Rahul Gandhi chu a chen mekna, sorkar bungalow chu April 22-ah chhuahsan hman turin hriattir a ni zui nghal.

Defamation case chungchangah kar liam ta Ningani khan Gujarat-a Surat Court chuan Rahul Gandhi hi thiam loh chantirin kum hnih jail tang turin a hrem. Court thutlukna tihchhuah a nih aṭanga darkar 24 pawh tling lo, Zirtawpni khan Lok Sabha Secretariat chuan Gandhi-a MP nihna chu hlihsak a nih thu a puang zui ve bawk.

MP a nihna hlihsak a nih hnuah, Thawhṭanni khan Lok Sabha Secretariat chuan Gandhi hi a bungalow chhuahsan tura hriattirna hi a pe leh nghal a ni. Nimin khan Gandhi chuan hriattirna an pek hi ziaka chhangin, dikna chanvo nei mah se sawibuai kher loin a chenna chhuahsan tura hriattirna an pek ang chu a zawm dawn tih a hrilh.

Congress party president hlui, Rahul Gandhi hi Z-plus security pek niin, kum 2005 aṭang khan tuna a chen mekna, 12, Tughlaq Lane bungalow-ah hian a khawsa tawh a ni. MP a nihna hlihsak a nih hnuah, Lok Sabha-a Housing Committee chuan a bungalow aṭanga chhuahtir tura thutlukna hi siamin, Secretariat chuan chhuak tura hriattirna hi a pe zui a ni.

Rahul Gandhi chuan a bungalow chhuahsan tura hriattirna pek a nih chungchangah Lok Sabha Secretariat chu lawmthu a hrilh a, term li Lok Sabha member atana thlan a nih chhungin a bungalow-ah hian hriatreng tur hun hlimawm tak tak a lo hmang tawh tih a sawi. Mahse engmah sawi buai loin, lehkhaa an hriattir ang chu a zawm dawn tih a hrilh nghal bawk.

Kharge-a'n sorkar laipui a dem

Congress president Mallikarjun Kharge chuan Rahul Gandhi chunga an chet dan chungchanga BJP kaihhruai sorkar laipui chu na takin a bei a, an party hotu hlui vau, tihṭhaih leh zak taka siam tuma sorkar chetdan chu a dem hle tih a sawi.

Rahul Gandhi chu a nu, Sonia Gandhi chenna, 10 Janpath-ah a cheng ve thei a, a nih loh pawhin amah pawhin a chenna tur in hi a pe thei tih Kharge chuan a sawi. "Rahul Gandhi tihchhiat vek tumin engthil pawh an ti duh zel dawn a ni. Hetianga sorkar chetdan hi ka dem takzet a ni," tiin nimina Parliament kawta chanchinthar lakhawmtute a kawmnaah a sawi.

Congress president chuan, "Democracy ramah chuan vawi tam tak thla li/thla nga chenna tur min pek dawng loin kan awm fo. Kei pawhin he bungalow hi thla ruk hnuah ka chang ve chauh a ni. Hmusit leh zak taka siam an duh vangin hetiang thil hi an ti a, an rilru puthmang hi ka dem takzet a ni," a ti.