State 21 aṭangin khawpui thar 26 siam rawtna thehlut

Sorkar laipui chuan state 21 aṭangin khawpui thar 26 siam rawtna a dawng tih housing and urban affairs ministry chuan a sawi.

State hrang hranga rawtna luhna hi sorkar chuan uluk taka a zirchian hnuah, khawpui pakua a thlang dawn a, state khatah pakhat chauh zel a ni ang. Heng khawpui thlan chhuahte siam leh cheina tur atan hian Rs vbc 1,000 ṭheuh a pe ang.

15th Finance Commission chuan khawpui siam thar tura thlan chhuahte tan hian perfomance-based challenge fund atan Rs vbc 8,000 a lo ruahman tawh a ni. Ministry chuan he fund kaltlang hian state pakhatin khawpui thar hi pakhat chauh a nei thei dawn tih sawiin, hmarchhak leh hill state-ahte chuan khawpui population a la tlem avangin state pahnihah khawpui thar pahnih thlan a, hemi atan hian Rs vbc 500 vel ruahman zawk tum a ni, a ti.

Khawpui thar siam tura rawtna thehlut state-te chu - Uttar Pradesh, Assam, Goa, Gujarat, Sikkim, Tamil Nadu, West Bengal, Madhya Pradesh, Maharashtra, Kerala, Jharkhand, Himachal Pradesh, Haryana, Andhra Pradesh, Arunachal Pradesh, Odisha, Punjab, Rajasthan, Nagaland, Manipur leh Uttarakhand-te an ni.