Defamation case-ah Uddav Thackeray leh Rajay Raut-te ko

Delhi High Court chuan Maharastra chief minister hlui, Uddhav Thackeray leh a fapa, state minister hlui Aditya Thackeray bakah a thawhpui hnai tak Sanjay Raut-te chu intihhmingchhiatna thubuai, defamation case chungchangah April 17-a inlan turin a ko.

Uddhav Thackeray leh midangte laka defamation case thehluttu hi Shiv Sena pawl phela Eknath Shinde lamṭang zinga MP, Rahul Ramesh Shewale a ni.

Shiv Sena party hi Eknath Shinde lamṭang leh Uddhav Thackeray lamṭang-a a phel hnuah, pawl pahnih hian an party hming leh symbol chhawmtu zawk nih inchuhin hun rei tak an buai zui a ni. Mahse Election Commission of India (ECI) chuan thutlukna siamin, Shiv Sena party hming leh symbol (bow and arrow) hi Shinde kaihhruai lamte chan turin a pe.

Eknath Shinde-te lam an hel a, Shiv Sena a phel hnuah Uddhav Thackeray kaihhruai Maharsathra-a ṭangrual sorkar chu a tla zui a ni. Hemi hnu hian Shinde chuan BJP thawhpuiin, sorkar thar an siam a, chief minister-ah a awm zui a, BJP hruaitu leh CM hlui, Devendra Fadnavis chu deputy chief minister-ah a awm bawk.

ECI-in party hming leh symbol changtu tur thutlukna a siam hi Thackeray lam chuan na takin an sawisel zui a, Shinde leh a kaihhruai lamte chuan Rs vbc 2,000 in party symbol hi an lei a ni, tiin an puh. Thackeray lamte thusawi dan avang hian Shewale chuan court-ah petition hi thehlutin,hetiang lam hawia thu an sawi khapsak turin a phut. Mahse court chuan Thackeray lamte thusawi a ngaihthlak ve phawt hma chuan order a tichhuak dawn lo tih sawiin, April 17-ah thu zawhfiah turin Thackeray leh midangte hi a ko a ni.