Damdawi siam ṭhat tawk loh vangin Pharma company 18 license titawp

Union health ministry chuan damdawi siamtu, pharmaceutical company 18 chu an damdawi siam a ṭhat tawk loh avangin license a tihtawp sak a, damdawi siam chu titawp turin a hriattir nghal bawk.

Ministry chuan pharma company dang 26 pawh show cause notice a pe bawk a ni. Drugs Controller General of India chuan ram chhunga damdawi siamtu, pharmaceutical company 76-te an endik a ni. Ni 15 chhung state 20-ah company-te hi central leh state team-te chuan surprise inspection an nei.

Tun hnaia ram dangah India rama damdawi siam avanga natna leh thihna a thleng nia sawi a awm avangin damdawi siamtu company-te hi endik an ni. Thla hmasa khan Gujarat-a pharma company, Zyuds Lifesciences chuan US-a gout damdawi a thawn bur 55,000 chuang a lakir leh a, heng damdawi hian impurities inspection an paltlang lo a ni.

Nikum khan Uzbekistan-ah India company siam, naupang khuh damdawi vangin naupang 18 an thihphah nia sawi a awm bawk a, hei vang hian he damdawi siamtu, Noida-a Marion Biotech company-a thawk mi pathum man an ni tawh bawk. Central leh Uttar Pradesh drug authority-te chuan an damdawi siamte endikin, an zinga 22 chu 'standard quality' pha lo a awm tih an hmuchhuak.

February thla khan Chennai-a pharma company-Global Pharma Healthcare chuan mitthlawr, EzriCare Artificial Tears eye drop a siam chu US health authority in a him tawk lo a, mi ṭhenkhat mit del phah leh mi pakhat thihna thleng nen inzawmna nei nia an report avangin an damdawi siam hi an lo titawp tawh bawk.