April 1 aṭangin UPI transaction rules tidanglam dawn

National Payments Corporatin of India (NCPI) chuan thuchhuah siamin, April 1 aṭangin Unified Payments Interface (UPI) hmanga pawisa inthawnah "Prepaid Payment Instruments (PPI)" fee lak a ni tawh dawn tih a sawi.

UPI kaltlanga pawisa inthawnah hian Rs 2,000 chinah an pawisa thawn aṭanga 1.1% fee chawi a ngai zel tawh dawn. Mahse UPI interchange fee hi merchant tan chauh a ni dawn a, consumer pangngaite a nghawng dawn lo. Card leh wallet hmanga merchant payment-ah chauh an chawi ang. Bank account-to-bank account transaction-ah customer leh merchant tan chawi a ngai dawn chuang lo tih payment body chuan a sawi bawk.

NCPI chuan fee lak hi September 30-ah ennawn leh a ni ang tih a sawi nghal bawk.

Pawisa inthawn nan UPI hi an hmang uar sawt hle. Kum 2022 khan UPI kaltlanga pawisa inthawn hi ṭum vaibelchhe 7,400 chuang awmin, pawisa inthawn hi Rs vbc nuai 125.94 a tling pha. Kumin January thla bikah khan UPI network hi 1.3% a ṭhan belh lehin, hemi thla chhunga transaction tih hi ṭum vaibelchhe 803 awmin, Rs nuai 13 vel a tling bawk a ni.