Congress party-in Rahul ban a nih duh lohna lantir zel tum

Congress party chuan an hruaitu, Rahul Gandhi-a MP nihna hlihsak a nih chungchanga an lungawi lohna chu thla khat chhung, kawng hrang hrangin lantir an tum tih a sawi.

Party hruaitute chuan Rahul Gandhi hian prime minister Narendra Modi leh sumdawng lian talbuai mek, Gautam Adani-te inzawmna neih dante a sawichhuah avangin, Parliament aṭanga paihchhuah a nih theihna tura ruahmanna siam a nih dante hi ram mipuite an hriattir dawn tih an sawi.

Congress hruaitu KC Venugopal leh Jairam Ramesh-te chuan Rahul-a MP nihna hlihsak a nih dan chu a hma aṭanga ruahman lawk vek nia a lan thu sawiin, he an thiltih chhan ber chu Adani venhim an tum vang a ni tih an sawi. Ram mipuite pawhin Rahul leh Adani chungchanga sorkar laipui chetdan chu dik lo leh, democracy kalphung lo niin an ngai a ni, an ti.

Rahul Gandhi ban a nihna chhan dik tak mipuite hriattir turin April 30 thleng outreach programme, "Jai Bharat Satyagraha" siam an tum tih Congress party chuan a sawi. Nimin khan programme hi kalpui ṭanin, district leh state level-ahte neih chhoin, April thla chawlhkar hnihnaah ram pum huapin neih an tum a ni.

Rahul-a MP nihna hlihsak a nih chungchang leh, sorkar laipuiin Adani a humhim tlat chungchangah Congress party bakah eptu party dangte pawhin BJP sorkar chetdan hi na takin an sawisel a ni. Eptu pawlte inhmunkhawmnaah pawh party hrang hrang hruaitute chuan an inhriatthiam lohnate dahṭha a, Indian democracy venghim tura theihtawp chhuaha thawhho a ṭul thu an sawi.