ECI-in Karnataka assembly inthlan neih hun tur puang

Election Commission of India (ECI) chuan nimin khan Karnataka Assembly inthlan neih hun tur a puang.

Chief election commissioner Rajiv Kumar chuan assembly inthlan hi May 10-ah neih a ni dawn a, May 13-ah vote tlate chhiarin inthlan result puan a ni dawn tih a sawi.

Seat 224 awmna, Karnataka assembly-ah hian BJP in ro rel mekin, seat 119 a nei a, Congress-in seat 75 leh JD(S) in seat 28 an nei mek a ni. Seat 224 zinga seat 36 hi SC tan leh, seat 15 hi ST puala dah a ni.

Karnataka-ah hian vote nei mi 5,21,73,579 an awm a, mipa 2,62,42,561 leh hmeichhia 2,59,26,319 bakah third gender 4,699 an awm a ni. CEC Kumar chuan vote nei thar mi nuai 9.17 awmin, kum 80 chung lam nuai 2.15 leh kum 100 chung lam voter 16,976 an awm tih a sawi. Kum 80 chunglam chin leh, taksa lama rualbanlote tana a ṭum khatna atan in lama vote an thlak theih dan tur ngaihtuahsak a ni dawn tih a sawi bawk.

Vote thlakna tur hian polling station 58,282 siam a ni dawn a, heng zinga 24,063 hi urban area-ah awmin, rural area-ah 34,219 a awm ang. Chawhrualin polling station pakhatah hian vote nei 883 zel awm ang an ni. Polling station 1,320 chu hmeichhe hlangin an enkawl ang.