Mamata-i'n sorkar laipui laka lungawi lohna lantir

West Bengal chief minister, Trinamool Congress (TMC) hruaitu Mamata Banerjee chuan BJP kaihhruai sorkar laipuiin an state a enhranna duh lohna lantirin, Kolkata khawpuia Dr BR Ambedkar lim bulah sit-in protest a nei.

Barnerjee hian sit-in protest hi darkar 30 chhung a nei a, Nilaini chawhnu lam aṭanga ṭanin nizan dar 7 thleng khan a nei a, TMC hruaitu leh worker eng emaw zatin an ṭawiawm.

Central-a BJP kaihhruai sorkar chuan TMC rorelna, West Bengal state chu a en hrang bik hle tih sawiin, an state tana MGNREGA fund, housing leh public work department hnuaia scheme hrang hrang thawhna turte tihtawpsakah a puh a ni.

Ram mipuite leh Indian democracy humhimna atan BJP sorkar chu paihthlak a ngai a ni tiin, Barnerjee chuan kum 2024 Lok Sabha inthlanpui neih turah eptu party hrang hrangte chu BJP bei tura inlungrual turin a ṭul thu a sawi. Kum 2024 inthlanpui chu ram mipuite leh BJP inbeihna tur a ni, a ti. Sakhaw hrang hrang - Hindu, Muslim, Sikh, Kristian, Parsi zuitute chuan BJP paihthlak an nih theihna tura an inthurual a ngai tawh a ni, a ti.

West Bengal CM chuan BJP chu 'washing machine' tia sawiin, BJP sawiseltu chu CBI leh ED an umzui tir nghal zel a ni, a ti. "BJP in thuneihna an chan hnuah, an party hruaitu thil dik lo tia puh awmte pawh central agency in an chhuizui tumah an awm lo," tiin a sawi. Eiru leh thil dik lo ti hruaitute chu BJP an zawm chuan an him zel tih a sawi.

Mamanta nawrh huaihawtna bulah hian a vahpa, TMC national general secretary Abhishek Barnerjee chuan rally-ah thu sawiin, BJP na takin a bei zui ve bawk. Abhishek chuan Lok Sabha member nihna hlihsak, Rahul Gandhi chungchang pawh sawiin, prime minister Narendra Modi ngei pawhin kum 2021 Bengal assembly inthlan dawna a thusawiah, Mamata Banerjee chungchang hmusit takin a sawi a, heti chung hian engvangin nge MP a nihna hlihsak a nih ve loh tiin a zawt.