Germany-in Rahul Gandhi ban a nih dan ngaihven

Germany chuan Congress party hruaitu, Rahul Gandhi-a Lok Sabha member a nihna aṭanga ban a nih dan chu ngaihvenin, a chungchangah hian democracy kalphung dik tak hman a ni tur a ni, a ti.

Germany foreign afffairs ministry thupuangtu chuan press briefing a neihah Gandhi chungchang hi sawichhuakin, "India-a opposition politician Rahul Gandhi hremna pek a nih dan te, Parliament member a nihna aṭanga ban a nih dante hi kan lo ngaihven reng a ni. Kan hriat dan chuan, Gandhi hian hremna pek a nih chungchangah a appeal thei a ni," a ti. Hemi hnuah chauh hian hrem a nihna chu kaltlangpui a ni dawn em tih a chiang chauh ang a, MP a nihna aṭanga ban a nih theihna tur pawh a chiang dawn chauh a ni, a ti. Germany chuan Gandhi case-ah hian dan hmang rorelna midang inrawlh lo leh, democracy kalphung dik tak hman a nih ngei an beisei tih a sawi bawk.

BJP kaihhruai sorkar laipui chuan Germany ministry thusawi hi a ngaimawh nghal hle a, union law minister Kiren Rijiju chuan chhangin, ramchhung inrelbawlnaa ram dang inrawlh chu India chuan a ngaithei dawn lo tiin a chhang let a ni.

Hetih lai hian US pawhin Rahul Gandhi case chu an ngaihven reng tih a lo sawi tawh bawk a, India sorkar hnenah democracy kalphung, freedom of expression vawnhim zel an duhna pawh an hriattir tawh hi US Department of State-a princial deputy spokesperson Vedant Patel chuan a sawi.

Rahul Gandhi hi kum 2019, April thlaa Lok Sabha inthlan neih tur atana Kolar rally-a Modi surname chungchanga a thu sawi avangin kar liam ta khan Gujarat-a Surat Court chuan thiam loh chantirin, kum hnih jail tang turin a hrem. Court-in a hremna hi Gandhi hian ni 30 chhungin appeal thei mah se, court thutlukna tihchhuah a nih aṭanga darkar 24 chhu ngin Lok Sabha MP a nihna chu hlihsak nghal a ni.