Thla 6 dawn hnua Covid-19 hri kai tam ber ni thleng

India ramah Covid-19 hri kai thar an pung chho leh zel a, Nilaini khan hri kai hmuh chhuah thar mi 3,016 awmin, thla ruk dawn hnua ni khata hri kai an tam ber ni a thleng.

Nitina hri kai thar, daily positivity rate chu 2.7% ah a kai chho a, weekly positivity rate 1.71% a ni bawk.

Hri kai mek, active case pawh 13,509 an tling chho tawh a, hri kai hmuh chhuah tawh aṭangin 0.03% an ni.

Nilaini vek khan Covid-19 hri vanga thi mi 14 awmin, an zinga pathum chu Maharashtra state mi an ni a, Delhi-ah mi pahnih, Himachal Pradesh-ah mi pakhat leh, Kerala-ah mi pariatin an thihpui bawk. Hripui thihpui hi 1.19% an awm tawh.

Tun kar chhoah hri kai an pun leh tak avangin state ṭhenkhat chuan emergency meeting neih an tum. Delhi khawpuiah January 16 khan hri kai thar an awm loh laiin, Nilaini khan hri kai mi 300 hmuh chhuah an ni leh tawh a ni. Delhi sorkar chuan hri leng thar leh dinhmun thlirin review meeting a ko a, health department official bakah state sorkar hnuaia damdawi-in hrang hranga medical director leh stakeholder dangte an tel.

Maharashtra-ah pawh Mumbai, Pune, Thane leh Sangli-ah hri kai hi an pung leh a, state sorkar chuan mipuiten Covid vaccine booster an lak ṭhat duh loh vang niin a sawi. Official-te chuan an state-ah hian booster dose la hi mi vaibelchhe khat pawh an tling lo tih an sawi a ni.