Gujarat-ah PM sawiselna poster tar vangin mi 8 man

Gujarat-ah prime minister Narendra Modi sawiselna poster tar chungchangah nimin khan Ahmedabad khawpui hmun hrang hrangah mi pariat man a ni.

Delhi-a rorellai, Aam Aadmi Party (AAP) chuan Delhi khawpuia PM Modi duh lohna poster campaign an neih hnuin, Ningani aṭang khan ram pum huapin campaign hi an kalpui leh a ni. Ahmedabad police-te chuan thubuai ziahluh a nih thu leh, khawpui chhung hmun tam takah heng poster mawi lo tak hi phalna nei loa tar a ni, an ti.

Gujarat AAP hotu Isudan Gadhvi chuan poster tar chungchanga mante chu an party worker vek an nih thu sawiin, BJP chu anmahni thu ang chauha rorelah puhin, AAP lian zel tur chu an hlau niin a sawi bawk. "BJP rorel dan hi han en teh u! Modi sawiselna poster tar vang ringawtin Gujarat-a AAP worker-te chu man a ni a, IPC section hrang hrang hnuaiah thubuai siamsakin jail tan tir an ni," a ti. Arvind Kejriwal duh lohna poster tartute lakah envangin nge FIR ziahluh a nih ve loh tih a zawt nghal bawk. BJP chuan an thiltih chu dan tumin theihtawp chhuah mah se, AAP worker-te chuan an campaign chu an kalpui zel dawn tih a sawi.

AAP hian "Modi Hatao, Desh Bachao" (Remove Modi, save the Country) tih ziahna poster campaign hi ram chhunga state 22-ah neiin, ṭawng 11 in an ziak a ni. English, Hindi leh Urdu bakah, Gujarati, Punjabi, Telugu, Bengali, Oriya, Kannada, Malayalam leh Marathi ṭawngte an hmang tel bawk. April 10 aṭang hian hetiang poster hi university hrang hrangah tar an tum tih an sawi.

Kar liam ta khan Delhi khawpuia PM Modi duh lohna poster tar chungchangah police-te chuan mi paruk manin, FIR 49 an ziak lut bawk. An man zingah hian printing press neitu pahnih an tel. Delhi police-te chuan vantlang hmun an tihbawrhban avang leh, danin a phut angin poster-ah hian an print-na printing press hming tarlan tel a nih loh avangin mi parukte hi man an ni tih an sawi. Mahse heng hi BJP lam tihtir niin AAP lam chuan an puh thung.

Delhi chief minister leh AAP national convenor, Arvind Kejriwal chuan India ram zalenna sual lai pawh khan, India ram awptu British-te hian zalenna sual a, poster tarte chu an man lo a, an lakah pawh FIR ziahluh a ni lo bawk tih a sawi.