MP-a temple stepwell chung chim vangin mi 36 an thi

Madhya Pradesh-a Indore-a Beleshwar Jhulelal Mahadev Temple stepwell chung chu Ningani khan a chim a, mi 36 an thi.

Ram Navami lawmna neih laiin, Ningani chawhma dar 11 vel khan Indore-a Patel Nagar area-a temple-a stepwell chung, concrete slab a chim a ni. Stepwell chung chim hian mi eng emaw zat a delh a, nimin zing thleng khan ruang hmuh belhin, thi hi 36 an tling tawh.

Chief minister Shivraj Singh Chouhan chuan nimin khan chhiatna thlenna hmun hi tlawhin, damdawi-ina hliam tuar enkawlte pawh a kan nghal a ni. Chhiatna thlenna hmuna Indian Army leh National Disaster Response Force (NDRF) leh State Disaster Emergency Response Force team-ten chhanchhuah hna an thawh dante a enpui nghal bawk.

June Indore police station-ah temple enkawltu, private trust chairman leh secretary-te lakah thubuai ziahluh a ni.

State sorkar chuan temple-a chhiatna thlenga thi chhungte hnenah zangnadawmna Rs nuai 5 ṭheuh leh, hliam tuarte hnenah Rs 50,000 ṭheuh pek an ni dawn tih a puang a, hei bakah hian PM National Relief Fund aṭangin mitthi chhungte hnenah Rs nuai 2 leh hliam tuarte hnenah Rs 50,000 ṭheuh pek an ni bawk ang.