Puducherry Assembly-in state-a hlankai phutna resolution pass

Puducherry Assembly chuan nimin khan Union Territory aṭanga state puitlinga hlankai phutna resolution chu lungrual takin an pass. Hei hi Assembly-a statehood resolution an pass ṭum 14-na a ni.

Chief minister N Rangasamy chuan MLA-te chu Delhi-ah an vaia kalin, state-a hlankai phutna resolution an pass chungchang chu prime minister Narendra Modi leh union home minister Amit Shah-te an sawipui dawn tih a sawi.

March 9 aṭanga neih ṭan, Assembly session hi nimin khan an zo. Assembly tawp ni hian statehood resolution hi MLA panga in an pharh a ni. UT aṭanga state puitlinga hlankai an nih chuan hmasawnna an neih phah thei dawn tih an sawi. Resolution hi MLA zawng zawngin an thlawp vek a ni.

CM Rangasamy chuan ro inrelna turin dikna an nei a, hemi ti thei tur chuan state puitlinga hlankai an nih ve phawt a ngai tih a sawi. Vawi tam tak Assembly-ah ngaihtuahin resolution pawh pass a lo ni tawh ṭhin a, mahse sorkar laipuiin an lo ngaihtuah ang tih ringawtin an lo chhang ṭhin tih a sawi. Tunah chuan resolution an pass tak hi government resolution angin sorkar laipuiah an thlen tawh dawn a, an ngenna pawh hi a hlawhtlin ngei an beisei tih a sawi.