Rahul Gandhi-a'n court-in thiam loh a chantirna a appeal dawn

Congress party hruaitu, Rahul Gandhi chuan Gujarat-a Surat court-in 2019 defamation case-a thiam loh chan tir a, kum hnih jail tang tura a hremna chu vawiin hian court sang zawkah a appeal dawn.

Gandhi-a legal team chuan, "Lower court thutlukna siam dan chungchangah Surat-a session court-ah petition thehluh tum a ni a, Rahul Gandhi pawh a tel ve ang," tiin a sawi. Congress party hruaitu hlun eng emaw zatin Surat-ah Gandhi an ṭawiawm dawn a ni.

March 23 khan Surat-a chief judicial magistrate HH Varma court chuan Gandh hi kum 2019-a election rally-naa a thusawi, 'Modi surname' chungchangah thiam loh chantirin kum hnih tang turin a hrem a ni. Court chuan kum 52 mi, Gandhi hi Indian Penal Code (IPC) section 499 leh 500 hnuaiah thiam loh chantir a ni tih a sawi. Court hian Gandhi bail dilna chu a phalsak nghal a, ni 30 chhung court sang zawka appeal-na hun a pe bawk.

Dan lama mithiamte chuan IPC section 499 hnuaiah, defamation case-a kum hnih tang tura hremna, Rahul Gandhi pek a nih ang hi thil thleng khat tak a nih thu an sawi.

Surat lower court-in March 23-ah thiam loh a chantir hnua, March 24 khan Gandhi hi Lok Sabha member a nihna hlihsak nghal a ni. MP a nihna rang taka hlihsak a nih nghal chungchangah eptu lamte chuan BJP sorkar an sawisel nasa hle.

Gandhi-a ukil-te chuan court-in Gandhi defamation case a ngaihtuah chungchangah, a tir aṭangin felhlel a awm tih an sawi. Gandhi-a'n Modi surname a sawinaah hian PM chu a target ber a nih avangin, complaint pawh hi PM Modi-a thehluh zawk tur a ni, an ti. Gandhi thiam loh chantir a nih takna, defamation case hi MLA Purnesh Modi-a thehluh a ni.

Court-in thiam loh a chantir tukah Rahul Gandhi hi MP a nihna hlihsak a ni a, a hnu ni rei loteah Delhi-a a official bungalow pawh chhuahsan tura hriattir a ni zui bawk. Congress party chuan Rahul Gandhi hian tunhnaia PM Modi leh sumdawng lian talbuai mek, Gautami Adani-ten inzawmna nghet tak an neih chungchang Parliament-ah sawiin, Adani Group chhui zui tura eptu lamten an phut mek laia PM Modi a ngawih tlat chungchangah na takin a bei zui a, hei vang hian Rahul Gandhi hi aw chhuah thei lo tura hrekbeh an tumna niin an puh. Congress chuan BJP leh PM Modi chu an party lamin hlawkpuina an neihna tura Adani Group hi project pek chungchangah pawh duhsakna lantirah an puh a ni.