Ni 3 chamin Bhutan lal a rawn zin dawn

Bhutan lal, King Jigme Khesar Namgyel Wangchuck chu ni thum cham turin vawiin hian India ram a rawn thleng dawn.

President Droupadi Murmu-i'n zin tura a sawm angin Bhutan lal hi a rawn zin dawn a, a cham chhungin President bakah prime minister Narendra Modi chu meeting a neihpui ang. External affairs minister S Jaishankar leh senior official-te pawh a hmu dawn bawk. Bhutan lal hi an ram foreign minister Tandi Dorji leh senior official-ten an rawn ṭawiawm ang.

Bhutan leh India hian ram inṭhianṭha leh inzawmna ṭha tak nei an ni a, ram hruaitute pawh an lo zin tawn fo tawh a ni. Kum 2009 August thla khan PM Modi chuan Bhutan hi a tlawh a, hemi kum vek hian MEA Jaishankar pawh a zin, kum 2022-ah a kal leh bawk. Kumin January thla khan foreign secretary Vinay Mohan Kwatra pawhin a tlawh a ni. Bhutan lal pawh hian kum 2022, September thlaa UK a zin dawn khan India a tlawh zuai a, km 2018 leh 2019-ah Bhutan Prime Minister leh, kum 2019-ah Bhutan Foreign Minister-te pawh India ramah rawn zinin, kum 2022 August thla khan Bhutan foreign secretary pawh a lo kal tawh bawk. Tun ṭuma King Jigme rawn zin pawh hian ram pahnihte inkara inlaichinna zau leh nghet zawk a siam ngei beisei a ni.

Covid-19 hri a hluar lai khan India chuan Bhutan hi a theih angin a lo pui tawh bawk a, damdawi tam tham tak thawnin, Covid vaccine Covishield pawh a thawn bawk a, Bhutan ram tana Covid vaccine thawn hmasa ber ram a ni.