BJP kan sorkar chuan buaina siamte a letlingin kan khai ang : Amit Shah

Union home minister Amit Shah chuan kum 2025-a Bihar state assembly inthlan neihah BJP-in sorkarna a siam chuan, buaina siam ṭhinte a letlingin an khai ang, tiin a sawi.

Bihar-a Ram Navami festival hmannaa Sasaram leh Nalanda-a tualchhung buaina a chhuah hnua, Nawada district-a rally a neihah he thu hi Amit Shah hian a sawi a ni. Shah chuan BJP sorkarnaah buaina hi a chhuak ngai lo niin a tarlang.

Shah chuan Bihar chief minister Nitish Kumar kaihhruai chu tualchhung buaina thlenna, Sasaram leh Nalanda-ah dan leh thupek kengkawh zo loah puhin, Union Home Minister a nih angin, India ram chhung Bihar-a thil thleng chu a ngaihven a ngai tih a sawi. "Kum 2024 inthlanpuiah central-ah kan sorkar leh, kum 2025-a Bihar state-a kan sorkar chuan, buaina siam ṭhinte chu a letlingin kan khai ang. Bihar hi tualchhung buainain a tichhe mek a ni tiin, boruak a pangngai chhoh leh thuai a beisei thu a sawi.

Bihar-a Ram Navami festival lawmna vuakveta Nalanda leh Sasaram district-a buaina chhuak vang hian mi 77 man an ni tawh a, FIR 12 ziahluh a ni bawk. CrPC Section 144 hnuaiah punkhawm khapna thupek pawh tihchhuah a ni bawk a ni. Pathianni aṭang khan Nalanda district-ah darkar 48 chhung atana internet service tihtawp a ni.

Sibal-a'n Amit Shah thusawi chhang let

Rajya Sabha MP Kapil Sibal chuan Amit Shah-a'n BJP sorkarnaa buaina a chhuak ngai lo tia a sawi chu rang takin a chhang let ve nghal a, sorkar laipui leh BJP sorkarna state-a tualchhung buaina chhuak hrang hrangte a rawn tarlang.

Union minister hlui Sibal chuan, "National Crime Records Bureau (NCRB) data aṭanga a lan danin, kum 2014-2020 chhung khan tualchhung buaina ṭum 5,415 a thleng. Kum 2019 bikah Uttar Pradesh-ah ṭum 9, Maharashtra-ah ṭum 4, Madhya Pradesh-ah ṭum hnih thlengin, Haryana, Gujarat leh Madhya Pradesh-ahte pawh a thleng nasa tih a sawi.

Congress party hruaitu hlui, Kapil Sibal hian nikum May thla khan Congress party chhuahsanin, Rajya Sabha inthlanah independent-in a chuh a, Samajwadi Party-in thlawpin thlan tlin a ni.