EC-in national leh state party list thar tichhuak dawn

Eleciton Commission of India (ECI) chuan 2024 Lok Sabha inthlanpui neih hmain, recognised national leh state party list thar a tichhuak dawn.

2019 Lok Sabha inthlan neih zawhah khan poll panel hian political party hrang hrang, a bikin Communist Party of India (CPI), Bahujan Samaj Party (BSP), Nationalist Congress Party (NCP), leh Trinamool Congress (TMC)-te chu national party status pek zel an nihna chhan tur sawifiah turin a ti a ni.

National party status hian hamṭhatna a keng tel a, state hrang hrangah party symbol ang khat vek an hman theih bakah, public broadcaster-ah inthlan laiin hun pek niin, New Delhi-a party office hmun tur pek an ni ṭhin bawk.

National leh state party enfiah hna hi thla liam ta aṭang khan buaipui ṭan a ni. Tunah hian national party pariat an awm mek a, chungte chu - Bharatiya Janata Party (BJP), Congress, TMC, BSP, CPI, Communist Party of India (Marxist), NCP leh National People’s Party (NPP)-te an ni. AAP national status pekna tur chu ngaihtuah mek a ni.