Sorkar laipuiin news channel tihchhuah a khapna SC-in sût sak

Sorkar laipuiin security kaihhnawih thil vang nia sawia Malayalam news channel tihchhuah khapna a lo siam tawh chu nimin khan Supreme Court-in a sût sak.

Supreme Court chuan sorkar an sawisel vang ngawtin media outlet-te chu aw chhuah theih loa hrek tur an ni lo, a ti.

Malayalam news channel, MediOne hian sorkar laipuia BJP kaihhruai sorkar policy leh hnathawh dante a sawisel fo avangin sorkar laipui nen an boruak a ṭha lo a, ministry of information and broadcasting chuan channel tihchhuah phalna a pek list aṭangin a paih zui a ni. He channel tihchhuah hnuhnun ber chu kumin January 31 kha a ni.

Mahse nimin khan Supreme Court chuan sorkar laipuiin khapna a siam hi sut sakin, MediaOne-in sorkar policy leh hnathawh a sawiselte chu ram dodalna lam anga puhsak ngawt tur a ni lo a, democracy ramah chuan press mite'n zalenna an neih chu thil ṭul leh pawimawh a ni, a ti. Ministry of information and broadcasting-in security clearance a ngai tia channel license a renew duh loh chungchangah, court chuan home ministry hnenah security chungchang chu chhuanlam dawrawm taka hmangah a puh bawk.

"National security hi mimal dikna chanvo rahbehsakna chhanah sawi a ni fo tur a ni lo, he case-ah hian hemi chungchang hi Home Ministry ngaihtuah chiang loin he thil hi a sawi a ni," tiin chief justice DY Chandrachud kaihhruai Court chuan a ti.

Judge-te chuan kum 2020-a Citizenship Amendment Act (CAA) dodalna lantir chungchang leh, Delhi khawpuia buaina chhuakte kimchang taka tichhuak ṭhin channel tlemte zinga pakhat, MediaOne tihchhuah khapna tur hian sorkar laipui chuan hmanrua leh finfiahna rintlak tak a nei lo, an ti bawk. "He channel hian firfiaka chete nena inzawmna an nei tih hriatna engmah a awm lo," tiin a sawi.

Sorkar chuan press-te chuan sorkar an thlawp zel tur tih ngaihdan a nei tlat tur a ni lo tiin court chuan a sawi a, sorkar sawisel chu TV channel licence tihtawp sak phahna tur a ni lo a ni, a ti.