SSC paper leak kaihhnawihah Telangana BJP hotu man

Telangana-a state BJP president leh MP, Bandi Sanjay Kumar chu SSC (Secondary School Certificate) Hindu examination question paper putruk kaihhnawihah nimin khan man a ni.

Thawhlehni khan SSC Hindi paper hi exam a ni a, mahse exam ṭan a nih hnu lawkah question paper hi a putru tih hriatchhuah a ni. A hma niin subject dang question paper pawh a putru nia sawi a ni tawh bawk.

Police-te chuan Hindi paper hi social media lamah BJP worker, journalist hlui Booram Prashant-a'n a thehdarh niin an sawi. Thil dik lo titu bera rinhlelh hi BJP nen inzawmna nei a nih avangin, party president Bandi Sanjay Kumar pawh hi an hreng zui ve niin an sawi.

Prime minister Narendra Modi-a'n Telangana state tlawh a tum lai taka state BJP hruaitu man a nih chungchangah Telangana-a eptu, BJP chuan rorellai, BRS sorkar chu na takin an sawisel. Party thupuangtu NV Subhash chuan Bandi Sanjay hi a chenna in aṭangin chhan ṭha tak nei loin police-te hian an man a ni, tiin union minister G Kishan Reddy chuan Telangana DGP Anjani Kumar hnenah Bandi Sanjay man a nih dan chhui chiang turin a lo ti bawk.

Hetih lai hian Telangana finance minister Thaneeru Harish Roa chuan BJP chu na takin a bei zui ve nghal a, "BJP thil sual ti chu man chhuah a ni. Politics khelhna hmanrua atan pawisawi lo naupangte chu an hmang duh a ni. Naupangte hmalam hun tur an ngaihtuah lo a, hei hi huaisen taka kan beih let a ngai a ni," a ti.