Andhra Pradesh-a Congress CM hluiin BJP a zawm

Andhra Pradesh chief minister hlui leh Congress party hruaitu, Kiran Kumar Reddy chuan nimin khan BJP a zawm. Hemi hma hian Congress veteran, union minister hlui AK Antony-a fapa Anil Antony pawhin BJP a lo zawm tawh bawk.

Kiran Kumar Reddy hian Andhra Pradesh aṭanga Telangana state din a nih hma khan AP-ah hian CM a lo ni tawh a, kumin March thla khan party hotute nena an inhriatthiam loh avangin Congress hi a chhuahsan a ni.

Andhra Pradesh hi nakkuma assembly inthlan hmachhawn tur a ni a, an state-ah hian rorellai YSR Congress leh eptu pawl, Telugu Desam Party chu inbitum ber an ni. Mahse Reddy-a'n BJP a zawm hian, inthlan lo awm turah BJP pawhin beiseina an neih phah dawn a ni.

Kum 62 mi, Reddy hian kum 2014-a AP state ṭhendarh a nih tirh khan Congress party a lo chhuahsan tawh bawk a, party thar 'Jai Samaikyandhra' a din zui a ni. Mahse a party din hian kum 2014 assembly inthlanah engmah an zui tak loh avangin, kum 2018 khan Congress party-ah a lut leh a, mahse hun eng emaw chen chu politics lamah a thawm a reh zui a ni.

Nimin khan New Delhi-a BJP headquarters-ah Reddy hi an party member-ah lawmluh a ni a, lawmluh a nih hnua thu a sawiah, kum 60 zet an chhungkua leh Congress party-in inzawmna an neih hnuah a chhuahsan chu a lo ngaihtuah ngai loh thil a nih thu a sawi. Congress hruaitute chu mipuite duhdan pawmsak thei lo leh, an kalphung siamṭha thei loah a puh. Hruaitute chuan anmahni chu dikah inngaiin, mi dang zawng chu dik loah an ngai a ni tiin a party chhuahsan tak chu a sawisel zui. Hemi rual hian prime minister Narendra Modi chu fakin, a kaihhruaina hnuaiah BJP hruaitute chuan ram hmasawnna turin theihtawpin an thawk a, ngaihtuahna fim tak nena thutlukna huaisen tak takte an siam a ni, a ti.