Covid hri kai an pun belh zel; Sorkar laipuiin high-level meeting a ko

Ram chhungah Covid-19 hri kai an pung chak leh hle a, Ningani khan ram pumah hri kai thar mi 6,050 awmin a ni hmasa aia hri kai hi 13% in an pung a ni. Nikum September 16 hnua ni khata hri kai 6,000 chuang an awm lehna hmasa ber a ni.

Hri kai an pun leh tak avangin union health minister Dr Mansukh Mandviya chuan nimin khan state leh union territory tina health minister-te chu review meeting a neihpui a, hri leng thar leh laka lo inven dantur leh inbuatsaih dante a sawipui a ni. MoS health Dr Pharati Pravin Pawar chuan sorkar laipuiin Covid-19 hri leng chungchangah sorkar laipui chuan state leh UT-te hnenah kaihhruaina a tihchhuah reng thu sawiin, prime minister Narendra Modi pawhin state tinte chu review meeting a lo neihpui tawh bawk a ni, a ti.

Ningani khan hripui vanga thi mi 14 an awm belh leh bawk a, heng mite nen hian ram pumah Covid-19 hripui thihpui hi mi 5,30,943 an awm tling tawh. Nimin zing dar 8 thleng khan Covid-19 hri kai hmuhchhuah tawh hi mi 4,47,45,104 an tling tawh a ni.

Ni tina hri kai thar rate hi 3.39%-ah a kai chho tawh a; hri kai mek hi mi 28,303 an awm tling tawh bawk. Mithiamte chuan tuna hri kai an pun chhoh lehna chhan hi XBB.1.16 variant vang niin an sawi a, mahse he variant kai zingah damdawi-in dah luh ngai khawp erawh an tam lo tih an sawi. Hemi rual hian sorkar chuan mipuite chu fimkhur tura chah thar lehin, pawn chhuahnaah face mask hmang ṭha tur leh, Covid-19 vaccine pawh a dose kima la turin a chah.