Parliament budget session zawh fel a ni

Parliament budget session chu Ningani khan a zo a, kum 1952 hnua budget session neiha rorelna hun an neih rei loh ber ṭum a ni.

Tun ṭum budget session-ah hian Congress party hruaitu Lok Sabha member a nihna hlih a ni te, London-a India democracy chungchang a sawi dan avanga BJP lamin ngaihdam dil tura an phutna te, eptute party-ten Adani Group buaina chungchanga Joint Parliamentary Committee (JPC) chhui chian tir an phut chungchang avangtein rorel inkhawm vawi tam tak tihtawp a ngaih phah a ni.

PRS Legislative Research-a head of outreach, Chakshu Roy chuan budget session thawh hnihnaah, hun an neih aṭangin Lok Sabha-ah rorelna hun 5% leh Rajya Sabha-ah 6% chauh an nei tih a sawi. "Tun session hi House-a zawhna chungchangah ngaihtuah hun hman rei loh ber niin, Parliament in hnihah hian starred question zinga 7% chauh chhan hman a ni," a ti.

2023 Budget session pumah Lok Sabha hian inkhawm ni 230 neih ni mah se, heng zingah hian a thawh khatnaah ni 10 leh a thawh hnihnaah ni 15 chiah mumal taka rorel inkhawm neih a ni. Rorel theih lo hun tam tak khawhral hi sum tam tak hlohna chauh a ni lo a, dan siamte leh ram a nghawng theih dan turte sawihona awm lo chuan ram pum tan thil pawi tak a ni, tiin Roy chuan a sawi.