PM Modi-a'n zirna pawimawhzia hrethiam pha lo : Sisodia

Aam Aadmi Party (AAP) hruaitu, jail-a tang mek Manish Sisodia chuan ram mipuite hnena lehkha a thawnah, prime minister Narendra Modi chuan zirna pawimawhzia a hrethiam pha lo a ni, a ti.

Delhi deputy chief minister hlui Sisodia lehkhathawn hi Delhi chief minister Arvind Kejriwal chuan a twitter-ah a dah a ni. Sisodia chuan, "Prime Minister lehkha thiam lo chu ram tan a hlauhawm a ni," tiin PM Modi chuan science chungchang pawh a hrethiam lo a, zirna pawimawhzia a hre lo a ni, a ti. Kum rei vak lo liam ta aṭang khan ram chhungah school 60,000 khar a ni tawh tih a sawi bawk.

Delhi sorkarin a tihtawp tak, kum 2021-22 excise policy a siam leh kalpui danah thil fel tawk lo awmah Sisodia hi inhnamhnawiha puhin, February 26 khan Central Bureau of Investigation (CBI) chuan Sisodia hi an man a, Tihar jail-ah a tang mek a ni.