Republic Day-ah Kristian hla 'Abide With Me' play tawh dawn lo

Republic Day hmanaa a tawp kharna atana brass band-te'n an play ṭhin, Kristian hla 'Abide With Me' (Ka Lalpa duhtak min awmpui ang che) chu kumin aṭangin play a ni tawh dawn lo a, a aiah India national song 'Vande Mataram' chu play a ni tawh zawk mai thei.

'Abide With Me' hi English hymn niin, Kristian hla lar tak a ni a, India Hnampa Mahatma Gandhi hla duh ber niin an sawi ṭhin. Tihdan phungah chuan Delhi-a Vijay Chowk hmuna Republic Day lawmnaa a kharna atan play a ni ṭhin. Mahse kumin aṭang chuan Defence Ministry chuan he hla aiah hian hla dang an play tawh zawk dawn nia tarlan a ni a, official taka thuchhuah siam la ni lo mah se India media-te chuan hemi chungchang hi an ziak uar hle.

Ministry official-te chuan kumtinin hla ṭhenkhat paiha hla thar play ṭhin a nih thu an sawi. India hla thlukte nasa zawka play an duh vangin 'Abide With Me' hi an paih ta tih an sawi a ni.

Kum 2018 khan hla 26 play zinga 25 chu India mite hla phuah a ni a, 'Abide With Me' chiah hi English hla play a ni. Nikumah pawh khan 'Abide With Me' chiah hi ramdang hla play awmchhun a ni tawh bawk a, kuminah erawh hei pawh hi an hnawl dawn ta niin a lang.