Rahul Gandhi-a'n Wayanad a tlawh dawn

Congress party hruaitu, Rahul Gandhi chuan Lok Sabha MP a nihna hlihsak a nih hnuah a ṭum khatna atan, naktukah a bial hlui Wayanad, Kerala a tlawh dawn.

Kerala-a Congress party kaihhruai ṭangrual pawl, United Democratic Front (UDF) chuan Gandhi hi ropui taka lo hmuah an tum a, vantlang inkhawm bakah road show-te buatsaih an tum a ni.

Gandhi hian Kalpetta-ah naktuk tlai dar 3:30 hian vantlang inkhawmah thu a sawi dawn a, he hunah state Congress president K Sudhakaran, AICC member leh Karnataka Pradesh Congress Committee (KPCC) hruaituten an ṭawiawm ang.

Congress party worker-te chuan Wayanad voter-te hnena Rahul Gandhi lehkhathawn chu in tinah an sem kual mek a, Gandhi thlen hmain sem chhuah hman an tum. He lehkhathawnah hian Gandhi chuan BJP kaihhruai sorkar laipui chu na taka beiin, RSS leh BJP thil tih dik loh chu a bei let zel dawn tih sawiin, hun harsa tak an tawh mekah lungrual takin an paltlang thei tih a sawi bawk.

Kumin February thla khan Rahul Gandhi hian a bial hi a lo tlawh tawh a, hemi ṭum pawh hian prime minister Narendra Modi chu sumdawng lian, Gautam Adani nena inzawmna neia puhin na takin a lo bei tawh bawk a ni.