State ṭhenkhatin face mask hmanna thupek tichhuak thar leh

Ram chhungah Covid-19 hri kai an pung chho leh mek a, hei vang hian state ṭhenkhat chuan hri leng laka invenna tur kaihhruaina thar an tichhuak.

Kerala state chuan nau pai lai, kum upa zawk leh natna benvawn neite chu pawn chhuahnaah face mask hmang ngei ngei turin a hriattir. State health minister Veen George chuan tun hnaia Covid kaihhnawiha thi zinga a tam ber chu kum 60 chunglam leh natna benvawn, a bikin diabetes neite an ni tih a sawi. Inrinnni khan Kerala-ah hian hri kai thar mi 1,801 an awm a ni.

Haryana state pawhin mipuite chu vantlang hmunah, mi 100 aia tam punkhawmna hmun, sorkar office leh mall-ahte face mask vuah vek turin a hriattir. Hri leng laka invenna tura kaihhruaina siamte chu zawm ṭha turin state mipuite a chah thar leh bawk.

Puducherry pawhin punkhawmna hmunahte face mask vuah vek tura thupek a tichhuak ve bawk. A bikin hospital, hotel, restaurant, zu dawr-a thawkte, hospitality and entertainment sector, sorkar office leh sumdawnna hmuna thawkte chuan face mask hi an hmang vek tur a ni tih sorkar thuchhuah chuan a tarlang.

Union health ministry data, nimin zinga tihchhuahin a tarlan danin, Inrinni liam ta khan ram pumah Covid-19 hri kai hmuh chhuah thar mi 5,357 awm belh lehin, hri kai enkawl lai chu mi 32,814 an tling chho tawh a ni. Hri kai mek hi hri kai hmuh chhuah tawh aṭangin 0.07% an ni.

Inrinni hian hripui vanga thi mi 11 an awm leh bawk a, heng mite nen hian India ramah Covid-19 hripui thihpui hi mi 5,30,965 an tling tawh. Inrinnia hripui vanga thite hi Gujarat-ah mi pathum, Himachal Pradesh-ah mi pahnih bakah, Bihar, Chhattisgarh, Maharashtra, Odisha, Uttar Pradesh leh Kerala-ah mi pakhat ṭheuh an ni.

Kar liam ta khan union health minister Mansukh Mandaviya chuan hri leng thar leh laka inven dan tur sawipuiin, state leh UT tina health minister-te chu review meeting a lo neihpui tawh a, vawiin leh naktukah hian ram pumah hri leng laka invenna tura inbuatsaihna atan mock drill neih a ni ang.