AAP-in 'Show Your Degree' campaign nei

Aam Aadmi Party (AAP) chuan nimin khan 'Show Your Degree' campaign an kalpui ṭan a, Bharatiya Janata Party (BJP) hruaitute chu ti ve turin an cho nghal bawk.

AAP national convenor leh Delhi chief minister Arvind Kejriwal-a'n prime minister Narendra Modi-a educational degree kimchang a dil chungchangah Gujarat High Court chuan public domain-ah hmuh turin a awm a ni tiin, Kejriwal hi Rs 25,000 a chawitir a ni. Court-in Kejriwal pawisa a chawitir hnuah, AAP MLA leh education minister Atishi chuan 'Show Your Degree' an neih tur thu hi puangin, nimin khan an kalpui ṭan a ni.

Atishi chuan nimin khan Delhi-a chanchinthar lakhawmtute kawmin, "Vawiin aṭangin campaign hi kan ṭan a ni. In hruaitute chuan an degree hi nitin an hmuh tir thei ang che u. Kei hian Delhi University aṭangin BA degree ka nei a, Oxford aṭangin Master degree pahnih ka nei bawk. Heng ka document-te hi a dik tak, original vek a ni," tiin a sawi. Party dang hruaitute pawh an degree hi tarlang vek turin a ngen a, a bikin BJP hruaitute chu ti ngei tura a duh thu a sawi.

PM educational degree chungchanga an zawhna neihah Gujarat High Court thupek siam dan hian AAP lung a ti awi lo a, khawpui hrang hrangah PM degree chungchanga zawhna an siam poster-te an tarchhuah phah a ni.

Kum 2016 khan Kejriwal-a'n Right to Information (RTI) hmanga PM educational degree kimchang a zawh ṭumin, hetih laia central information commission M Sridhar Acharyulu chuan Prime Minister Office, Gujarat University leh Delhi University-te chu PM Modi graduation leh post-graduation degree kimchang tichhuak turin a hrilh a ni. Hemi hnu hian Gujarat University chuan an website-ah PM Modi degree neih hi an dah lang nghal a, mahse Information Commission thupek siam hi an khing let zui bawk.

BJP chuan PM Modi degree nia an sawi, Delhi University aṭanga BA leh, Gujarat University aṭanga MA a pass na hi an thehdarh a, mahse Kejriwal chuan heng document-te hi rintlak tawk lohna a awm niin a sawi.

Gujarat High Court-in a ngaihtuahnaah, sorkar lawyer Tushar Metha chuan university pahnihte hian information hi an tichhuak tur a ni lo tiin, "Democracy ramah chuan ram hruaitu ni turin doctorate degree nei emaw, ziak leh chhiar thiam emaw pawh ni se danglamna a awm lo. Hemi chungchang hi mipui ngaihven a ni lo a, a privacy thlengin a nghawng thei a ni," tiin a sawi a, PM degree chuan a chanvo chelhah nghawng a nei lo tih a sawi.

Mahse Kejriwal-a ukil chuan hei hi chhangin, election nomination form-ah educational qualification ziah lan ngaiin dah a ni a, hei vang hian zawhna siam chu danin a phal a ni, a ti ve thung. "Degree certificate ringawt kan dil a, a mark sheet kan dil hlei nem," tiin AAP lawyer Percy Kavina chuan Gujarat High Court-ah hian a sawi a ni.