Hri leng thar leh vangin ram pumah mock drill neih a ni

India ramah Covid-19 hri kai an pun chhoh leh avangin, nimin khan ram chhunga private leh public hospital hrang hrangah an inbuatsaih dan thlirin mock drill neih a ni a, vawiinah chhunzawm a ni ang.

Union health minister Mansuk Mandaviya chuan Jhajjar, Haryana-a All India Institute Of Medical Science (AIIMS)-a drill neih a enpui a ni.

Minister chuan hri leng thar leh laka invenna turin sorkar chu a inbuatsaih ṭha tawk tih a sawi a, ICU khum, oxygen supply leh in enkawlna tura mamawhte pawh ruahman vek a ni a, kar tin an inbuatsaih dan hi ennawn ṭhin a ni ang, a ti.

Hri variant thar lo awm zel mah se, hri leng do hna kalpuina tur chuan five-fold strategy, Test-Track-Treat-Vaccinate- COVID-Appropriate Behaviour zawm te chu kalpui chhunzawm zel a ni dawn tih Minister chuan a sawi bawk. State leh union territory tinte chu test kalpui ṭha turin leh, sample test-na atana RT-PCR hman pawh tipung turin thurawn pek an ni bawk.