EC-in national party-ah Aam Aadmi Party (AAP) a pawm; NCP, TMC leh CPI-te national party nihna a titawp

Election Commission of India (ECI) chuan political party hrang hrangte dinhmun a ennawn hnuah, Thawhṭanni khan thuchhuah siamin Aam Aadmi Party (AAP) chu national party-ah a puang. Hetih lai hian National Congress Party (NCP), Trinamool Congress (TMC) leh Communist Party of India (CPI)-te chuan national party an nihna an hloh thung.

ECI hian 2014 leh 2019 Lok Sabha inthlanpui leh, kum 2014 hnu lama state assembly inthlan ṭum 21 awma party hrang hrangte dinhmun thlirin, he thutlukna thar hi a siam a ni.

National party aṭanga TMC, NCP leh CPI-te paih an nih hnuah, national party hi paruk an awm ta a, chungte chu - BJP, Congress, Bahujan Samaj Party (BSP), CPI(M), National People's Party (NPP) leh AAP-te an ni. National party-te hian ram pumah an candidate chuan an party symbol hi an hmang thei vek a, hei bakah Delhi-ah party office tur hmun pek an ni bawk.

Election Symbols (Reservation and Allotment) Order, 1968 chuan national leh state party-a pawm theih chin tur dante siamin, EC chuan national party atana pawm thar AAP hian state pali-ah state party dinhmun hi a thleng thei tawh tih a sawi.

State party ni thei tur chuan assembly inthlan hnuhnung berah vote tla aṭanga 6% leh MLA pahnih tal an neih a, an state-a Lok Sabha inthlanpui hnuhnung berah vote tla aṭanga 6% leh MP pakhat tal an neih phak emaw, Assembly-ah seat awm zat aṭanga 3% an neih phak emaw a ngai a ni.

National party ni tur chuan Lok Sabha emaw Assembly inthlan emawah state pali emaw, a aia tamah vote tla aṭanga 6% hmuh phak a, MP pali tal an neih a ngai. Hei hi a nih loh pawhin Lok Sabha-a seat awm aṭangin 2% neih phak a, state pathum aṭang talin MP an neih a ngai bawk.

AAP : ECI-in national party atana a pawm thar, AAP hi Delhi, Goa leh Punjab-ahte state party an nih hnuah, kum 2022-a Gujarat assembly inthlanah khan vote tla aṭanga 12.92% hmuin, state party a ni pha ve leh a ni.

AAP national convenor leh Delhi chief minister Arvind Kejriwal chuan hun rei lote chhunga national party dinhmun an thleng thei chu thil mak a ni tiin, "He dinhmun hi mipuite min thlentir a ni. Kan lakah beiseina sang tak an nei a, he mawhphurhna lian tak hi min pe ta a ni," a ti.

TMC : EC chuan TMC hi Manipur leh Arunachal Pradesh-ah state party a ni pha tawh lo tih a sawi. West Bengal leh Tripura-ah erawh chuan state pary a la ni chhunzawm zel a, 2023 assembly inthlan behchhanin Meghalaya-ah state party status pek a ni bawk.

TMC hian 2019 Lok Sabha inthlanah khan Arunachal Pradesh leh Manipur-ah an chuh lo a, Tripura leh West Bengal-ah vote 0.40% leh 43.28% a hmu. Kum 2016-2018 chhunga assembly inthlanna neihnaah, West Bengal-ah vote 44.9% hmuin, Manipur-ah 1.41% leh Tripura-ah 0.30% an hmu. 2021-a West Bengal assembly inthlanah vote 48.01% an hmu a, 2022-a Manipur assemby inthlanah erawh an chuh ve lo.

National party aṭanga paih a nih chungchangah, ECI thutlukna siam khin let dan hi an ngaihtuah mek tih TMC hruaitu chuan a sawi.

NCP : Kum 2017 leh 2018-a Goa, Manipur leh Meghalaya assembly inthlanah khan NCP hian vote tla aṭangin 2.28%, 0.95% leh 1.61% chauh hmu phain, state party a nihna a hloh. Maharashtra-ah chuan 2019 inthlanah khan vote 16.71% hmuin state party a la ni a, kumina Nagaland inthlanah state party dinhmun a nei pha leh bawk.

NCP hruaitute chuan EC thutlukna siam hi an zirchiang hmasa phawt dawn a, a ṭul angin hma an lak zui ve tur thu an sawi.

CPI : CPI hi West Bengal leh Odisha-ah state party a ni pha tawh lo tih EC chuan a sawi a, mahse Kerala, Manipur leh Tamil Nadu-ah erawh chuan state party a la ni thung. Kum 2016-2019 chhunga assembly inthlan neihnaah, Tamil Nadu-ah vote 0.79% a hmu a (mahse MP pahnih a nei thung), West Bengal-ah 1.45% leh Manipur-ah 0.74% (2019 Lok Sabha inthlanah vote 8.27% a hmu pha thung) leh Odisha-ah 0.12% vote a hmu a ni. State pathumah chauh state party dinhmun a hauh phak tawh avangin national party a nihna chu a tihtawp sak a ni.

ECI hian kum 2019 aṭang khan political party hrang hrangte dinhmun hi a ennawn a, mahse hripui leng vangin hun eng emaw chen an khaihlak phah. Thawhṭanni khan party-te chungchanga thutlukna a siam thar hi a tichhuak thei ta chauh a ni.

Tun hnaia inthlan neihnaa an chet ṭhat avangin, EC chuan Nagaland-a Lok Janshakti Party, Meghalaya-a Voice of the People Party leh Tripura-a Tipra Motha party-te chu state party status a pe thar.

Hetih lai hian party paruk chuan state party an nihna an hloh ve thung a, chungte chu Manipur-a Peoples Democratic Alliance, Puducherry-a Pattali Makkal Kachi, Uttar Praesh-a Rashtriya Lok Dal, Andhra Pradesh-a Bharat Rashtra Samithi, West Bengal-a Revolutionary Socialist Party leh Mizoram-a Mizoram People's Conference party-te an ni.