Thla 7 chuang hnua hri kai thar tam ber ni a thleng leh

India ramah Covid-19 hri kai an pun belh zel a, Thawhlehni khan hri kai thar mi 7,830 awm lehin, thla sarih dawn hnuah ni khata hri kai thar an tam ber ni a thleng leh.

Union health ministry-in nimin zinga data a tihchhuahah, ram pumah hri kai enkawl mek, active case hi 40,215 an tling chho tawh a ni.

Thawhlehnia hripui vanga thi mi 16 awmin, Kerala state-in a hma record-a a telh loh mi panga telh leh bawkin, hripui vanga thi record hi 21 an ni. Heng mite nen hian ram pumah Covid-19 hripui thihpui hi mi 5,31,016 an awm tawh.

Indian SARS-CoV-2 Genomics Consortium (INSACOG) data aṭanga a lan danin, state leh UT 22-ah omicron sub-variant XBB1.16 kai 1,774 hmuh a ni tawh a ni. Inkaichhawn awlsam tak, XBB1.16.1 sub-variant kai hi state leh UT 13-ah mi 234 hmuh an ni tawh bawk.

Delhi khawpuiah Thawhlehnia hri kai thar hmuh chhuah hi mi 980 awmin, positivity rate hi 25.98% ah a kai chho tawh a ni. Mi pali test-ah pakhat zelin hri hi an kai ang a ni.

Odisha state chuan an state-ah ni li chhung a zawnin nitin hri kai thar mi 100 chuang an awm tawh vangin, sorkar laipui hnenah Covid vaccine booster dose la dawng lote hnena pek turin vaccine dose 50,000 pek belh turin a ngen. Family welfare department director, Bijay Panigarhi chuan ministry of health and family hnenah Odisha tana CorBEvax vaccine pe tura ngenna hi a thawn.

Covid hri kai an pun leh avangin, hri leng thar leh thei tur laka inven leh inbuatsaihna atana ni hnih awh mock drill neih chu Thawhlehni khan zawh a ni. Covid-19 mock drill hi state leh UT 35 chhunga district 724-ah hlawhtling taka neih a ni tih health and family welfare ministry chuan a sawi.