Punjab army station-a inkahna thlengah sipai 4 an thi

Punjab-a Bathinda military station chhungah nimin khan inkahna a thleng a, sipai pali an thi.

Indian Army chuan he thil thleng chungchangah hian thuchhuah siamin, "Zing dar 4:35 velah Bathinda Military Station chhungah inkahna a thleng a, quick reaction team-te tirh nghal niin he hmun hi midang tlawhpawh theih loh tura khar nghal a ni. Sipai pali an thi a, thil thlen dan kimchang chhui chhian mek a ni," a ti. A hnuah thuchhuah a siam leha, station chhunga pawikhawihna thleng hi Army leh Punjab police-ten an chhui dun thu a sawi leh bawk.

Report ṭhenkhatin an tarlan danin, ni hnih liam taa INSAF rifle leh a mu chin hriat loa bo chu nimin zinga pawikhawihna atan hian hman a ni. Inkahna hi station-a officer's mess chhungah a thleng nia sawi a ni.

Additional Director General of Police (Bathinda Range) SPS Parmar chuan he thil thleng hi firfiakte thiltih a nih loh thu leh, pawn lam aṭanga beihna a ni loh thu a sawi.