US ambassador-designate Eric Garcetti a rawn thleng

US ambassador-designate Eric Garcetti chuan Thawhlehni zan khan India a rawn thleng.

Kum hnih liam taa hetih laia US ambassador Kenneth Juster a ban hnuah, kum 2021 January thla aṭang khan India-a US embassy chu ambassador nei loin a awm a, ambassador uapna hnuaia an awm loh rei ber ṭum a ni.

Kumin March 15 khan Garcetti hi India rama US ambassador 25-na atan tihchian a ni. Kum 12 zet Los Angeles city council member lo ni tawhin, kum 2013 khan Los Angeles mayor 42-na atan thlan a ni a, kum 2017-ah thlan nawn a ni leh bawk.

Garcetti hi reserve component-ah kum 12 chhung naval officer-in a lo awm tawh bawk a, Rockefeller Next Generation Leadership Fellow, Asia 21 Fellow of the Asia Society, Young Fellow of the French-American Foundation, Aspen Institute-ah Rodel Fellow leh Reboot Fellow-ahte thlan a lo ni tawh.

Kum 2005 khan Kennedy chhungkua leh Kennedy Library-in elected official, President Kennedy hmathlir neihte kalpui leh thawk ṭha hnena kumtina an hlan ṭhin, New Frontier Award pek a ni.

Columbia College, Columbia University-ah BA degree neiin, Hindi leh Indian culture and history a zir a, Columbia University-a School of Internation and Public Affairs-ah Master degree a zo leh a ni.