Ukraine President-in PM Modi hnenah lehkha thawn

Ukraine president Volodymyr Zelenskyy chuan prime minister Narendra Modi hnenah lehkha thawnin, an ram tana chhawmdawlna, a bikin damdawi leh damdawi hmanruate pe turin a ngen.

India ram tlawha rawn zin, Ukraine first deputy foreign minister Emine Dzhaparova chuan President Zelenskyy lehkhathawn hi Thawhlehnia minister of state for external affairs and culture Meenakshi Lekhi nena meeting an neih ṭumin a hlan.

Nikum February 24-a Russia-in Ukraine ram a run hnuah, Dzhaparova hi Ukraine official zinga India ram rawn tlawh hmasa ber a ni. Ni thum cham turin a rawn zin hnuah, nimin khan an ram lamah a kir leh a ni.

Ministry of External Affairs (MEA) chuan ram pahnihte hian an hun neih remchan dan thlirin, Ukraine khawpui Kyiv-ah foreign office consultation hi an nei leh dawn tih a sawi.

PM Modi hian Russia leh Ukraine ram hruaitute hi a lo be fo tawh a, nikum October 4-a President Zelenskyy nena an inbiak ṭumin, an buaina chu sipai chakna hmanga chinfel theih a ni dawn lo tih leh, boruak ṭha leh inremna a awm theihna turin India chuan a theih anga inpuih a huam thute pawh a lo hrilh tawh a ni. India hian Russia-in Ukraine a run chungchangah, official-in Russia ram demna thu hi a la siam lo a, buaina chu ram pahnihten inbiakna hmanga an chinfel a ngai a ni, tih zawng chauhin a la sawi a ni.